في نقاش على أحد الغروبات كان الحديث يدور على اوضاعنا وأوضاع كل الناس والمواطنين وكل شخص يحدد سبب الأزمة الحاصله وأنا كان لي تعليق بسيط مؤلف من سط واحد وهو: انتخب صح بتزبط الامور.
طبعاً البعض ايدوا كلامي والعض قالو شو خص الازمه المعيشيه بالانتخاب. وبعبارة ( انتخب صح) لذلك قمت بالتوضيح التالي ادناه :
اعزائي الغاليين جداً:
اعرف ان هذا الكلام يزعج البعض وبنفس الوقت يفرح به البعض والكلام هو:
يا اخوان من يعتقد ان ازمة لبنان هي ازمة ماليه فهو غلطان وغلطان كثير كثير .
ليش غلطان ساقول السبب:
يا زميلي العسكري المتقاعد انت كان معاشك حوالي ١٢٥٠ دولار حتى ١٥٠٠ دولار.
ووصل راتبك إلى ١٥٠ دولار وهلق صار ٥٠٠ او ٦٠٠ بعد تحركاتكم الناجحة ، ووصلتم إلى مرحله من التقشف بحيث لم تعد تستطيع تغيير دولاب سيارتك ولا تدفع قسط مدرسة اولادك او تدفع اشتراك المولد . ولما تطالب بحقوقك يقولون لك الخزينة فارغه!!! وفجأةً الخزينة بتصير مليانة وبيمنحوا زودة فوريه لكل نائب على قيد الحياة او ميت او متقاعد ٢٠٠٠ دولار!!! دغري الخزينة صار فيها فلوس ، وبيمنحوا لموظفي الماليه ومجلس الإنماء والإعمار وهيئة المرفأ والكازينو وهيئة النفط ومصرف لبنان والكهرباء واوجيرو رواتب بين ٥٠٠٠ دولار حتى ١٨ الف دولار، اين العدل في هذا الموضوع.
يعني بالمشبرح انت وانا رواتبنا بالكاد نعيش فيها بكرامه بينما النواب والوزراء والمسؤولين والموظفين بالهيئات المذكورة أعلاه يتقاضون رواتب مثل رواتب سويسرا وكندا وبريطانيا وقطر والسعوديه حتى ان هذه الدول لا تعطي رواتب بهذا المستوى العالي. يعني انت وانا نجوع وغيرنا يعوم ويسافر ويتبردخ، هلق يمكن يطلعلي حدا يقول لي : شو خص هذا الموضوع بموضوع الانتخابات وكلمتي من شوي انو انتخب صح بيزبط الوضع.
سوف اسمح لنفسي بالشرح:
يا عزيزي الغالي لما انت انفقرت وتبهدلت وعم تشتغل ٣ شغلات تا يكون وجهك مستور مع زوجتك واولادك وين كان المسؤول يللي انتخبتوا؟؟؟ وليش أنا انتخبتوا ؟؟ تا يمثلني ويحافظ على حقوقي فهل حافظ على حقوقي ؟ وهل حافظ على اقتصاد بلدي؟؟ وهل سمعتوا شي نايب او زعيم وقف وصرخ عالتلفزيون كما نصرخ نحن وقال: الدوله سرقت فلوسنا؟؟ الدوله حجزت فلوسنا؟؟ الدوله دمرت قيمة العمله وبقاش فينا نشتري حاجياتنا وأساسيات المعيشه؟؟ سمعتوا شي زعيم او نايب او مسؤول قال هالكلام؟؟؟ أنا ما سمعت بس ليش ما سمعت ولا انتم سمعتوا؟؟؟ لانو يا حبيبي فلوسو ما انسرقوا وعملتو ما هبطت لانه عملتو بالدولار وليس الليره ولان ساعة ما بدو بيروح عالبنك يقول لصاحب البنك انقبر يا عرص أعطيني فلوسي فهل يتجرأ صاحب البنك ما يعطيه فلوسو؟؟؟
نعود ونقول شو خص الفلوس بما قلته أنا ( انتخب صح)
ما قلته هو جوهر الأزمة يا اخوان نحنا ما عندنا نواب للوطن نحنا عندنا نواب للطوائف وانتبهوا عم احكي عن كل الطوايف ما حدا يروح فكرو لبعيد
كل الطوايف، يا اخوان زعيم حيالله طايفه هو زعيم على مين؟؟ على الشعب الروسي او الكويتي او الفرنسي؟؟ هو زعيم عليي وعليك وعلى طايفتو ولما انت تنتخب صح وتجيب النائب يللي بيحافظ على حقوقك وما يحكي بنفس طائفي ومذهبي وكل الطوايف بتعمل نفس الشي بيصير عندك مجلس نواب وطني غير طائفي يعبر عن طموحنا ورغباتنا، سيقول لي احدكم كلهم متل بعضهم لما بيركبوا عالكرسي بينسوا المواطن وهنا اقول له انو فيك تحاسبو المره الجايي وما تنتخبوا وساعتها بيصير بدو رضاك وصوتك ومصلحتك، حبايبي إذا انت وكلت محامي بقضيه وطلع فاشل او اشتغل ضدك وتآمر عليك بتروح بكل سهوله عند كاتب العدل بتعمل له عزل من التوكيل وهيك
بتعمل مع النائب يللي لم يحافظ على مصالحك بتعزلو المره الجايي وبتجيب غيرو إذا انتخبت صح.
أنا شو بدي النائب يجي يعزيني بإمي وبيي؟؟ في ناس كتير تعزيني بدي ياه يشرع قوانين تحافظ عليي وعلى ولادي بس للاسف لما هالدولة الخرا حشا قدركم تسمح للنايب يتدخل بفحوصات الدرك والامن العام والحربيه ويجيب ناس يوظفهم ف هوذي وحتى ولو لبسوا بدلة الدوله هوذي زلم عند يللي عمل لهم واسطة، وانا بدي صوت للنايب الفلاني لانو ساعدني صب السطح ويشيل عني زبط السياره ويجبلي رخصة سلاح بس هيك ما منقدر نبني وطن هيك عم نجدد زعامة المسؤول بسبب الوسايط يللي بيعملها ولأنه جاء يعزيني بالمأتم هيك رح نبقى اذا بقينا بهالعقلية .
عشان هيك يا اخوان لازم ننتخب صح. حتى ضمن هذا القانون الطائفي انت قادر تغير وتعمل نتيجة وخيار جديد يحافظ عليك ويبني بلد.
ومين قال انو المرشح لازم يكون ضابط متقاعد او عميد او ما بعرف رتبته؟؟؟ ليش الرتباء المتعلمين المحترمين من شو بيشكوا ؟؟ ليش بعض النواب متعلمين قد الرتباء المتعلمين ؟؟؟؟
انتو معكم خبر انو ٦٠٪ من المجلس الحالي هم ابناء نواب او احفاد نواب او ابناء عم او ابناء اخت نواب؟؟؟
انتو معكم خبر انو ٥٠٪ من المجلس الحالي معهم بكالوريا فقط؟؟؟؟؟
و٧٥ ٪ من رتباء القوى المسلحه معهم إجازات جامعيه !!!!
لازم نخلص بقا من التبعيه والواسطة ونخلص من المشي مع القطيع،
لا تؤاخذونا طولنا عليكم بس الألم كبير. كبير جداً